శీతాకాలం సమస్యలకు ఆయుర్వేద చిట్కాలు!

ఆంధ్రజ్యోతి (06-11-2019): చలికాలంలో ఎన్ని జాగ్రత్తలు పాటించినా చిన్నపాటి సమస్యలు సమసిపోకుండా వేధిస్తూనే ఉంటాయి. వాటిని ఆయుర్వేద చిట్కాలతో అదుపుచేసే వీలుంది. అదెలాగంటే.....
 
పొడిచర్మం: పెరుగు, మజ్జిగ కలిపి చర్మానికి పూసుకొని ఆరిన తర్వాత కడిగేసుకోవాలి. కలబంద గుజ్జుకు చెంచాడు కాకరకాయ రసం చేర్చి, కలిపి ముఖానికి పూసుకుని రాత్రంతా అలాగే ఉంచుకోవాలి. పొద్దున్నే కడిగేసుకోవాలి.
 
పొడి జుట్టు: గుడ్డు పచ్చసొన, ఆలివ్‌ ఆయిల్‌ కలిపి వెంట్రుకలకు పట్టించి 20 నిమిషాల తర్వాత తలస్నానం చేసేయాలి. నీళ్లలో శీకాకాయ, బ్రహ్మి కలిపి మిక్సీలో ముద్దగా చేసి, వెంట్రుకలకు మాస్క్‌లా వేయాలి. ఆరిన తర్వాత కడిగేసుకోవాలి.
 
పాదాల పగుళ్లు: అరటిపండు గుజ్జును పగుళ్లకు పట్టించి 10 నిమిషాల తర్వాత కడిగేసుకోవాలి. రాత్రి పడుకునేముందు పాదాలకు వంటనూనె పట్టించి, సాక్స్‌ వేసుకోవాలి.
 
దగ్గు, జలుబు: నీళ్లలో జింజర్‌ రూట్‌ నానబెట్టి తాగాలి. ఆహారంలో అల్లం ఎక్కువగా వాడాలి. గొంతు నొప్పి, దగ్గు, జలుబు తగ్గడం కోసం పాలలో కొద్దిగా పసుపు వేసుకొని రాత్రి పడుకునే ముందు తాగాలి.
 
కాళ్లవాపు: గ్లాసు నీళ్లలో ధనియాలు కలిపి నీళ్లు సగం అయ్యేవరకూ మరిగించాలి. ఇలా వాపు తగ్గేవరకూ ఆ నీళ్లను ప్రతిరోజూ తాగుతూ ఉండాలి. కాళ్లను నువ్వుల నూనెతో మర్దన చేస్తూ ఉండాలి.