కురుల కోసం కొత్తకొత్తగా...

13-08-2019: ఆరోగ్యకరమైన, పొడవైన కురులు మగువల సింగారాన్ని రెట్టింపు చేస్తాయి. అయితే చాలామంది మహిళలను వేధించే సమస్యల్లో జుట్టు ఊడిపోవడం ప్రధానమైనది. కురులను ఆరోగ్యంగా ఉంచుకోవడం కోసం రకరాల నూనెలు, షాంపూలు, హెయిర్‌ మాస్క్‌, కండీషనర్స్‌ వాడినా ఒక్కోసారి ఫలితం ఉండదు. అయుతే సొగసైన కురులతో మెరిసిపోవాలంటే గంజి నీళ్లను జుట్టుకు పట్టించాలి అంటున్నారు కాస్మెటిక్‌ డెర్మటాలజిస్ట్‌ జయశ్రీ శరద్‌. బియ్యం నీళ్లలోని సుగుణాల గురించి ఆమె చెబుతున్నారిలా...

గంజిని రోజంతా గది ఉష్ణోగ్రత వద్ద ఉంచాలి. దాంతో గంజి పులుస్తుంది. తరువాత ఆ గంజిని వేడి చేసి, చల్లార్చాలి. అందులో కొన్ని చుక్కల అవసరమైన నూనెలు కలపాలి. ఈ మిశ్రమాన్ని వెంట్రుకలు శుభ్రం చేసుకునేందుకు వాడాలి. ఇలా చేస్తేజుట్టు రాలడం తగ్గిపోయి, ఆరోగ్యమంతమైన కురులు మీ సొంతమవుతాయి.

జట్టు రాలడం తగ్గుతుంది: పద్దెనిమిది రకాల అమినో ఆమ్లాలతో తయారైన కెరాటిన్‌ అనే ప్రొటీన్‌ వెంట్రుకల్లో ఉంటుంది. బియ్యం నీళ్లలో వీటిలోని ఎనిమిది అమినో యాసిడ్స్‌ ఉంటాయి. ఇవి జుట్టు రాలిపోవడాన్ని సహజ పద్ధతుల్లో నివారిస్తాయి. ముఖ్యమైన ప్రొటీన్లు, మినరల్స్‌, యాంటీ ఆక్సిడెంట్లతో పాటు బి, సి, ఇ విటమిన్లు ఉంటాయి. బి విటమిన్‌ కురులను దృఢంగా చేస్తుంది. సి విటమిన్‌ మాడుకు తేమను అందించే సెబం ఉత్పత్తిని పెంచుతుంది. ఇ విటమిన్‌ వెంట్రుకలు రాలడాన్ని అడ్డుకుంటుంది.

బలమైన కురులు: బియ్యం నీళ్లలోని అమినో ఆమ్లాలు కురులు పెరగడంలో, వాటిని బలంగా మార్చడంలో సాయపడతాయి. దీంతో వెంట్రుకల చివర్లు చిట్లిపోవడం తగ్గుతుంది. క్రమం తప్పకుండా బియ్యం నీళ్లతో కేశాలను శుభ్రం చేసుకుంటే, తలభాగంలో పీహెచ్‌ ఒకేస్థాయిలో ఉంటుంది. శిరోజాలు సాగేగుణాన్ని పొందడమే కాదు ఆరోగ్యంగా మారతాయి.

మెరుపునిస్తుంది: పులియబెట్టిన బియ్యం నీళ్లలో విటిమిన్‌ ఇ అధికంగా ఉంటుంది. ఇది దెబ్బతిన్న, నిర్జీవమైన జట్టును సున్నితంగా, పట్టులా మెరిసేలా చేస్తుంది. బియ్యం నీళ్లలోని అయనోసిటాల్‌ అనే కార్బోహైడ్రేట్‌ కురులకు రంగు, స్టయిల్‌ను ఇస్తుంది.

చుండ్రు మాయం: జుట్టు రాలడానికి చుండ్రు కూడా ఒక కారణం. డాండ్రఫ్‌ శిరోజాలను బలహీనంగా మార్చి, తొందరగా ఊడిపోయేలా చేస్తుంది. బియ్యం నీళ్లలో చుండ్రుకు కారణమయ్యే శిలీంధ్రాన్ని తొలగించే శక్తి ఉంటుంది. దాంతో డాండ్రఫ్‌ సమస్య తగ్గిపోతుంది.